Gero eta lehiakorragoa eta globalizatuagoa den panorama industrialean, manipulazio- eta ekoizpen-prozesuen doitasuna hobetzea erronka handia da zero akatseko fabrikazioa bermatzeko. Prozesu horietan erabiltzen diren baliabideei eta tresnei aplikatutako doitasun horrek, fabrikazioaren digitalizazioarekin eta automatizazioarekin batera, industria-eredu adimendunerantz aurrera egitea ahalbidetzen du. 

Alde horretatik,  Tekniker zentro teknologikoak, Basque Research and Technology Alliance (BRTA) erakundeko kide denak 2021etik koordinatzen duen PRECITEK proiektuak, arreta jartzen du manipulazio- eta ekoizpen-baliabideetan eta fabrikazio-prozesuetan ekipo horien zehaztasuna  hobetu eta egonkor mantentzeko moduan, akatsak saihesteko eta sistema horien eraginkortasuna areagotzeko. 

Teknikerrek, ekimenaren buru izateaz gain, doitasun-teknologietan aplikatuko du bere ezagutza, hala nola eredu birtualen aplikazioan (digital twins edo biki digitalak), proiektuan aztertuko diren sistema mekatronikoak optimizatzeko: manipulazio-sistemak (robot industrialak) eta ekoizpen-baliabideak (makina-erremintak). 

Ekoizpen-bitartekoen kasuan, ekimenak tamaina handiko makina-erremintetan jartzen du arreta. Ekipamendu-mota horretan, zehaztasuna hobetzea eta egoera horri denboran iraunaraztea alderdi kritikoa eta, aldi berean, gaitzailea da ekoizpen-prozesu konplexuetarako eta balio erantsiko prozesuetarako.

Teknikerren lanak sistema horien portaeraren modelizazioa eta karakterizazioa eta haien zehaztasunaren optimizazioa izango ditu ardatz, esaterako, eredu birtualen diseinua (digital twins edo biki digitalak), haien portaera aztertzeko edo erabiltzaile-interfaze baten eta erakusle teknologikoen garapena, proiektuan zehar sortutako ezagutza guztia industria-sarera transferitzeko eta euskal enpresei doitasun-teknologiak transferitzeko. 

Horretarako, neurtzeko sistema trazagarrietan oinarritutako autokalibrazio-teknikak garatu eta integratuko dira, eredu birtualak datu errealekin egokituko dira eta eredu prediktiboak erabiliko dira proiektuan zehar diseinatutako soluzioen irismena eta funtzionamendua baloratzeko.  

PRECITEK Eusko Jaurlaritzaren Elkartek programak finantzatutako ekimena da, Tekniker buru duena, eta BRTAko kide diren beste zentro teknologiko batzuek ere hartzen dute parte: Ideko, Tecnalia eta Vicomtech, UPV/EHU eta IMH Fabrikazio Aurreratuaren eta Digitalaren Campusa.