Newtek

Zentro teknologikoak eskaintza teknologiko osoa dauka laser bidezko fabrikazioaren eremuan, “Laser for Manufacturing Lab” izenekoa. Bertan, merkatuan bakanak diren laser-ekipoen eta osagaien diseinua eta fabrikazioa sartzen dira.

Fabrikazio aurreratuaren esparruan, eta bere espezializazioaren barruan, balio erantsi handiko laser-ekipoak eta -osagaiak diseinatzeari eta fabrikatzeari zuzendutako irtenbide integralak garatzen ditu IK4-TEKNIKERek.

Zentro teknologikoak eskaintza osoa dauka eremu horretan, “Laser for Manufacturing Lab” deritzonean sartuta. Hain zuzen ere, horixe da laser bidezko fabrikaziorako duen balio-proposamena, eta Makina-erremintaren Biurteko Azokaren azken edizioan aurkeztu zuen.

Ekipoen eta osagaien simulazioa

Osagai edo ekipo bat diseinatzeko prozesuan, hasierako zatia izaten da simulazioa. Bi simulazio mota daude:

• Simulazio optikoa: Laser-erradiazioa eta erradiazio horrek askotariko osagai optikoekin duen elkarreragina modelatzen dira.

Simulazio optikoaren eremuan, nabarmendu egin behar da IK4-TEKNIKERek potentzia ertaineko laser-diodoaren sistema baten diseinuan eta simulazio optikoan egin duela lan; era berean, gainera, hari bidezko LMDrako (Laser Metal Deposition) buru baten diseinuan eta simulazio optikoan aritu da.

• Elementu finituen simulazioa (FEM): Laser bidezko teknologietan oinarritzen diren fabrikazio-prozesuak optimizatzeko erabiltzen dira hainbat teknika numerikoren (elementu finitoak, bolumen finitoak, metodo analitikoak eta abar) bidezko modelaketa eta simulazioa. Laborategi-mailako entseguak gidatzen eta osatzen dira horien bidez, eta, horrela, proba-errore prozedura garestiak saihesten dira.

Honako hauek dira IK4-TEKNIKERek eremu honetan garatu dituen adibideetako batzuk: tenplaketa-prozesu konbentzionalen eta altzairuen gaineko urrutiko tenplaketaren optimizazioa (alderdi mikroegiturazkoak eta mekanikoak barne hartuta), fabrikazio gehigarriko prozesuetan dauden distortsioen eta tentsioen kalkulua eta metala-metala eta metala-polimeroa soldadura-prozesu hibridoen optimizazioa.

Ekipoen diseinua eta fabrikazioa

Laser for Manufacturing Lab-ek laser-ekipo bereziak eskaintzen ditu. Gainera, industria-prozesuetan sartzen ditu horiek, eta sektorean gaur egun dauden joerei erreparatzen die; hala nola, produktibitate handiko teknologien garapenari (high throughput).

• Ekipo bereziak: Bezeroak eskatzen dituen irtenbideetara egokitutako ekipamendu berezia, merkatuan irtenbide estandarrik ez duena.

Lan-eremu horren barruan, hari bidezko LMD bidezko fabrikazio gehigarrirako ekipo bat diseinatu eta fabrikatu du zentro teknologikoak, metalezko egitura handiak (1900 x 900 x 800 mm³-raino) fabrikatzeari begirakoa.

Halaber, laser bidezko soldadura-ekipo bat oso-osorik garatu du zentro teknologikoak, bai alde mekatronikoa, bai potentzia handiko laserra, polimeroak edo polimeroa-metala lotura disimiliarrak soldatzeko.

• Ekipo berezien integratzea ekoizpen-prozesuetan: Ekipo bereziak fabrikatzeko gaitasuna osatzeko, ekipo horiek bezeroen ekoizpen-prozesuetara sartzeko aukera egon behar da.


• Industriarako produktibitate handiko irtenbideak: Laser for Manufacturing Lab-ek laser-merkatuaren gaur egungo joerei erreparatzen die, eta, hala, produktibitate handirako optimizatu diren ekipoetan duen eskarmentua eskaintzen du. (Ekipo komertzialen fabrikazio-abiaduran hobekuntza nabarmena egitea da (X2, X5, X10), amaierako kalitatea murriztu gabe).

Zentzu horretan, gainazal handietan mikrozulaketak egiteko gaitasuna duen ekipo bat garatu du zentro teknologikoak aplikazio aeronautikoetarako; eta, horrekin, zulaketa abiadura handian egitean, jario laminarra kontrolatzeko egitura hibridoak garatu ahal dira (HLFC ingelesez).

Smart osagaien diseinua eta fabrikazioa

Ekipo osoak diseinatu eta fabrikatzearekin bat, Laser for Manufacturing Lab-ek irtenbideak eskaintzen ditu smart osagaien fabrikazioan, bere sistemetan nahiz merkatuko sistemetan sartzeko horiek.

• Pitak, eustoinak eta buruak: Buruak, pitak eta eustoinak fabrikatzea, askotariko laser-prozesuak garatzeko.
• Monitorizazio eta prozesuen kontrolerako osagaiak: Laser-prozesuak monitorizatzea eta zehatz-mehatz kontrolatzea ahalbidetuko duten osagaiak integratzea.
• Laser-izpia aldatzeko sistemak: Laser-izpia konformatzea, aldatzea edo banatzea (beam delivery) ahalbidetzen duten osagaiak garatzea. Laser-ekipoetan osagai horiek sartuta, prozesu berriak optimizatzen edo garatzen dira.

Prozesu berriak abiarazteak eta material/betekizun berriak behar izateak irtenbide orokorra egotea eskatzen dute, eta hobe irtenbide orokor horrek laguntzaile bakarrean integratzen baditu gaitasun horiek guztiak: Laser for Manufacturing Lab-en, jakina.